Վենետիկում Aurora Dialogues քննարկումների շրջանակում կանցկացվի «Հանդիպում «Ավրորայի» հերոսների հետ» միջոցառումը: Այն տեղի կունենա 2021 թ. հոկտեմբերի 8-ին Իտալիայում սպասվող 2021 թ. «Ավրորայի» միջոցառումների ընթացքում: Հանդիպման ժամանակ 2021 թ. «Ավրորայի» հինգ հերոսները կներկայացնեն իրենց աշխատանքն ու ոգեշնչման աղբյուրը, կքննարկեն, թե ինչպիսի աջակցություն է անհրաժեշտ իրենց համայնքներում շոշափելի փոփոխություն իրականացնելու համար: Քննարկումը տեղի կունենա Վենետիկի միջազգային համալսարանի դահլիճում՝ Սան Սերվոլո կղզում:
Քննարկմանը «Ավրորայի» հերոսները կպատասխանեն նաեւ դահլիճից հնչող հարցերին: Միջոցառման լեզուն անգլերենն է՝ հայերեն, ռուսերեն, ֆրանսերեն, իսպաներեն եւ իտալերեն համաժամանակյա թարգմանությամբ:
Ավելին իմանալու եւ միջոցառման մասին նորություններին տեղյակ լինելու համար հետեւեք մեզ Facebook, Twitter, Instagram եւ Linkedin հարթակներում:
2021 թ. «Ավրորա» մրցանակի շնորհման արարողությունը եւ դրան ուղեկցող միջոցառումները տեղի կունենան Վենետիկում (Իտալիա) 2021 թ. հոկտեմբերի 8-10-ը: Այդպիսով, «Ավրորա» մրցանակի շնորհման արարողությունն առաջին անգամ կանցկացվի Եվրոպայում, ինչն էլ կընդգծի սերտ կապը համաշխարհային կարեւորության մշակութային այս կենտրոնի եւ «Ավրորայի» գաղափարի միջեւ, որը խորապես արտահայտում է հարգանքը մարդկային կյանքի հանդեպ, ինչի կրողն է յուրաքանչյուր հայ եւ «Ավրորա» համաշխարհային շարժման յուրաքանչյուր անդամ: Կորոնավիրուսի համավարակի բռնկումից հետո սա կլինի նաեւ «Ավրորա» մրցանակի շնորհման առաջին ոչ առցանց արարողությունը:
Մոդերատոր
Դելե Օլոջեդե
«Ավրորա» մրցանակի Ընտրող հանձնաժողովի անդամ, Պուլիցերյան մրցանակի դափնեկիր (Նիգերիա/ԱՄՆ)
Գրող, խմբագիր եւ հրատարակիչ Դելե Օլոջեդեն ավելի քան չորս տասնամյակ աշխատում է լրագրության ոլորտում: Գործի բերումով նա եղել է 100-ից ավելի երկրում, այդ թվում նաեւ որպես New York Newsday պարբերականի գրասենյակի ղեկավար ՄԱԿ-ում, Յոհաննեսբուրգում եւ Պեկինում: Ռուանդայի ցեղասպանության հետեւանքները լուսաբանելու համար 2005 թ. արժանացել է լրագրողական ամենաբարձր պարգեւին՝ Պուլիցերյան մրցանակին:
Բանախոսներ
Ֆաթուն Ադան
2020 թ. «Ավրորա» մրցանակի դափնեկիր, «Էլման» խաղաղության եւ մարդու իրավունքների կենտրոնի գործադիր տնօրեն (Սոմալի)
Ֆարթուն Ադանը եւ նրա դուստր Իլվադ Էլմանը ղեկավարում են Սոմալիի «Էլման» խաղաղության եւ մարդու իրավունքների կենտրոնը: Տարիներ շարունակ մայր եւ դուստր պայքարել են մարդու իրավունքների, կանանց իրավունքների պաշտպանության համար, նպաստել խաղաղաշինությանը եւ կատարել մանկահասակ զինվորների վերականգնողական աշխատանքներ։ 2010 թ. Ադանը նախաձեռնել է «Քույր Սոմալի» ծրագիրը՝ աջակցելու գենդերային բռնությունների ենթարկվածներին, որոնց հաջողվել է բռնաբարությունից հետո ողջ մնալ եւ/կամ խուսափել պարտադիր ամուսնությունից: 2011 թ․ Սոմալիի մայրաքաղաք Մոգադիշոյում նա հիմնել է սեռական բռնությունների առաջին թեժ գիծը եւ բռնաբարությունների ճգնաժամային կենտրոնը:
Գրեգուար Ահոնգբոնոն
2021 թ. «Ավրորայի» հերոս, հոգեկան առողջության ակտիվիստ, «Սբ Կամիլ» ընկերակցության հիմնադիր (Բենին/Կոտ Դ՛Իվուար)
Մեխանիկ, որը դարձավ հասարակական գործիչ եւ հիմնադրեց «Սբ Կամիլ» (St Camille Association) ընկերակցությունը, որն ավելի քան 30 տարի գործում է հոգեկան հիվանդության խարանը մեղմելու եւ Արեւմտյան Աֆրիկայի կարիքավոր մարդկանց համար ժամանակակից հոգեբուժական ծառայություններ կազմակերպելու համար։ Աֆրիկյան մշակույթում հոգեկան հիվանդությունը հաճախ համարվում է դժբախտություն, եւ դրանով տառապողներին հաճախ մեկուսացնում են հասարակությունից կամ բառացիորեն շղթայակապ թողնում փողոցում:
Նուբար Աֆեյան
«Ավրորա» մարդասիրական նախաձեռնության համահիմնադիր, «Մոդերնա» ընկերության համահիմնադիր եւ նախագահ, Flagship Pioneering ընկերության գլխավոր գործադիր տնօրեն (ԱՄՆ)
Դոկտոր Նուբար Աֆեյանը Flagship Pioneering ընկերության հիմնադիրն է եւ գլխավոր գործադիր տնօրենը։ Ընկերությունը բացառիկ ձեռնարկություն է, որը մարդու առողջության ու մարդկային կայուն զարգացման բարելավման նպատակով ծրագրում, ստեղծում, ռեսուրսներ է մշակում եւ զարգացնում կենսագիտական առաջնակարգ ընկերություններ: Բիոքիմիայի ինժեներ, ձեռներեց դր. Աֆեյանը գրանցել է 100-ից ավելի արտոնագրեր եւ իր աշխատանքային 33-ամյա գործունեության ընթացքում համահիմնել ու օգնել է հիմնելու կենսագիտական ու տեխնոլոգիական ավելի քան 60 նորաստեղծ ընկերություն։ Նա COVID-19 (կորոնավիրուս) գլոբալ համավարակի դեմ պայքարի շրջանակում ՌՆԹ պատվաստանյութեր արտադրող նորարարական առաջատար ընկերության՝ «Մոդերնայի» համահիմնադիրն ու նախագահն է եւ մի շարք մասնավոր ու պետական ընկերությունների խորհուրդների անդամ։
Լորդ Արա Դարզի
«Ավրորա» մրցանակի Ընտրող հանձնաժողովի նախագահ, Լոնդոնի կայսերական քոլեջի Գլոբալ առողջապահական նորարարությունների ինստիտուտի տնօրեն (ՄԲ)
Պրոֆեսոր Դարզին Լոնդոնի կայսերական քոլեջի Գլոբալ առողջապահական նորարարությունների ինստիտուտի տնօրենն է: Նա նաեւ Լոնդոնի կայսերական քոլեջի վիրաբուժության ամբիոնի եւ քաղցկեղի հետազոտության ինստիտուտի անդամ է: Լորդ Դարզին Կատարում գործող Համաշխարհային առողջապահական նորարարությունների գագաթնաժողովի գործադիր ղեկավարն է: Նա նաեւ NHS Trust-ի կայսերական քոլեջի հիվանդանոցի եւ Royal Marsden NHS Trust-ի խորհրդատու վիրաբույժ է:
Ջուլիեն Լուսենգե
2021 թ. «Ավրորայի» հերոս, խաղաղության եւ կանանց իրավունքների ակտիվիստ, Կանանց համերաշխություն հանուն ներառական խաղաղության եւ զարգացման կազմակերպության համահիմնադիր եւ նախագահ (ԿԴՀ)
Նա խաղաղության եւ կանանց իրավունքների ակտիվիստ է, որը տարիներ շարունակ աջակցել է Կոնգոյի Դեմոկրատական Հանրապետությունում պատերազմի ժամանակ սեռական բռնության զոհերին՝ բարձրաձայնելով Կոնգոյի հազարավոր կանանց հուսահատ վիճակի մասին եւ բացահայտելով ու պատասխանատվության ենթարկելով հանցագործներին:
Ռուբի Ալբա Կաստանյո
2021 թ. «Ավրորայի» հերոս, իրավապաշտպան, Գյուղացիների, գյուղական աշխատողների եւ շրջակա միջավայրի պաշտպանների Մետայի ասոցիացիայի հիմնադիր (Կոլումբիա)
Մարդու իրավունքների պաշտպան, որը նախկինում եղել է իրենց իրավունքների համար պայքարող գյուղական աշխատողների միավորման՝ SINTAGRIM-ի գլխավոր դեմքերից մեկը: Մահվան սպառնալիքներից եւ մի քանի մահափորձերից հետո ստիպված է եղել հեռանալ կազմակերպությունից: Այսօր նա իր պայքարը շարունակում է որպես Գյուղացիների, գյուղական աշխատողների եւ շրջակա միջավայրի պաշտպանների Մետայի ասոցիացիայի՝ ASOCATDAME-ի ղեկավար:
Աշվաք Մոհարամ
2021 թ. «Ավրորայի» հերոս, բժիշկ (Եմեն)
Եմենցի բժիշկ, որը կենսապահպան աջակցություն է տրամադրում Եմենի Հոդեյդա նահանգի սովյալ բնակչությանը: Մի տարածաշրջանում, որտեղ գործնականում բժիշկներ չեն մնացել, նա տեղի բնակչության վերջին հույսն է՝ նրանց տրամադրելով բժշկական օգնություն, սննդի զամբյուղներ եւ առաջին անհրաժեշտության պարագաներ:
Ռուբեն Վարդանյան
«Ավրորա» մարդասիրական նախաձեռնության համահիմնադիր, Noôdome հարթակի համահիմնադիր, սոցիալական ներդրող եւ գործարար (Հայաստան/Ռուսաստան)
Ռուբեն Վարդանյանը հայկական արմատներով ռուս առաջատար գործարար է, սոցիալական ձեռներեց եւ վենչուրային բարերար, «Ավրորա» մարդասիրական նախաձեռնության համահիմնադիր։ Նա իր տիկնոջ՝ Վերոնիկա Զոնաբենդի հետ ներդրումներ է կատարում գլոբալ կրթության, Կայուն զարգացման նպատակների (SDG) եւ մարդասիրական խնդիրների լուծման ոլորտներում իրականացվող բազմաբնույթ ու լայնածավալ նախագծերում: Ռուբեն Վարդանյանն ու իր ընտանիքը տարբեր երկրների իրենց գործընկերների հետ ավելի քան 1.5 մլրդ ԱՄՆ դոլարի կոմերցիոն եւ բարեգործական բնույթի ներդրումներ են կատարել սոցիալ-ձեռնարկատիրական նախագծերում աշխարհով մեկ, որոնք ուղղված են մարդու զարգացումը խթանող ներառական էկոհամակարգի ստեղծմանը:
Փոլ Ֆարմեր
2021 թ. «Ավրորայի» հերոս, բժիշկ-մարդաբան, «Առողջապահական գործընկերներ» կազմակերպության համահիմնադիր (ԱՄՆ)
«Առողջապահական գործընկերներ» կազմակերպության համահիմնադիր եւ գլխավոր ռազմավար: Նա իր կյանքը նվիրել է կարիքավորներին օգնելու, ամբողջ աշխարհի ամենաաղքատ եւ անապահով համայնքների համար առողջապահական կայուն լուծումներ մշակելու եւ դրանք իրականացնելու գործին:
Գլխավոր լուսանկարը՝ Վենետիկի միջազգային համալսարան