«Այժմ եզակի պահ է պատմության մեջ, քանի որ մենք բախվում ենք, ամենայն հավանականությամբ, ավելի շատ սպառնալիքների, իհարկե, ժողովրդավարության տեսանկյունից, քան երբեւէ Երկրորդ համաշխարհային պատերազմից հետո, ինչպես նաեւ գոյաբանական ճգնաժամերի՝ կլիմայի փոփոխություն, բռնի տեղահանման խնդրի խորացում: Ներկայում 120 միլիոն մարդ լքել է իր տունը, եւ որոշ կանխատեսումների համաձայն՝ մինչեւ 2050 թ. կլիմայի փոփոխության պատճառով, հավանաբար, մեկ միլիարդ մարդ ստիպված կլինի լքել իր տունը»,- որպես մոդերատոր իր բացման խոսքում նշեց «Ավրորա» մրցանակի Փորձագետների խորհրդի անդամ, RefugePoint կազմակերպության գլխավոր գործադիր տնօրեն Սաշա Չանոֆը «Բարեգործության դերը մարդասիրության եւ մարդու իրավունքների պաշտպանության գործում» թեմայով քննարկմանը: Այն տեղի ունեցավ 2024 թ. մայիսի 9-ին Լոս Անջելեսում՝ Մարդու իրավունքների եւ մարդասիրության ֆորումի ընթացքում:

Քննարկման բանախոսներն էին Global Whole Being Fund հիմնադրամի համահիմնադիր եւ գործադիր տնօրեն Նեգար Թեյարը, Human Rights Watch կազմակերպության համանախագահ, «Դը Շմիդթ» ընտանեկան հիմնադրամի գործադիր փոխնախագահ Էմի Ռաոն եւ Ներգրավված միջազգային դոնորների ցանցի խորհրդի նախագահ Քերեն Անսարան: 

«Բարեգործության դերը մարդասիրության եւ մարդու իրավունքների պաշտպանության գործում» խորագրով անգլերեն քննարկման տեսագրությունը՝ ստորեւ.