«Այժմ եզակի պահ է պատմության մեջ, քանի որ մենք բախվում ենք, ամենայն հավանականությամբ, ավելի շատ սպառնալիքների, իհարկե, ժողովրդավարության տեսանկյունից, քան երբեւէ Երկրորդ համաշխարհային պատերազմից հետո, ինչպես նաեւ գոյաբանական ճգնաժամերի՝ կլիմայի փոփոխություն, բռնի տեղահանման խնդրի խորացում: Ներկայում 120 միլիոն մարդ լքել է իր տունը, եւ որոշ կանխատեսումների համաձայն՝ մինչեւ 2050 թ. կլիմայի փոփոխության պատճառով, հավանաբար, մեկ միլիարդ մարդ ստիպված կլինի լքել իր տունը»,- որպես մոդերատոր իր բացման խոսքում նշեց «Ավրորա» մրցանակի Փորձագետների խորհրդի անդամ, RefugePoint կազմակերպության գլխավոր գործադիր տնօրեն Սաշա Չանոֆը «Բարեգործության դերը մարդասիրության եւ մարդու իրավունքների պաշտպանության գործում» թեմայով քննարկմանը: Այն տեղի ունեցավ 2024 թ. մայիսի 9-ին Լոս Անջելեսում՝ Մարդու իրավունքների եւ մարդասիրության ֆորումի ընթացքում:

Քննարկման բանախոսներն էին Global Whole Being Fund հիմնադրամի համահիմնադիր եւ գործադիր տնօրեն Նեգար Թեյարը, Human Rights Watch կազմակերպության համանախագահ, «Դը Շմիդթ» ընտանեկան հիմնադրամի գործադիր փոխնախագահ Էմի Ռաոն եւ Ներգրավված միջազգային դոնորների ցանցի խորհրդի նախագահ Քերեն Անսարան: 

Human Rights Watch կազմակերպության համանախագահ եւ «Դը Շմիդթ» ընտանեկան հիմնադրամի գործադիր փոխնախագահ Էմի Ռաոն բացատրեց, թե ինչպես է իրենց հիմնադրամն աստիճանաբար ընդլայնել ծրագրերը՝ ներառելու մարդու իրավունքները, քանի որ նրանք հասկացել են, որ այն ամենը, ինչ անում են, ի վերջո կապված է այս կարեւոր հարցի հետ: «Ամեն օր ես արթնանում եմ եւ մտածում, թե ինչպես կարող եմ ավելի շատ մարդկանց ներգրավել՝ ֆինանսավորելու միջազգային պայքարը հանուն մարդու իրավունքների, քանի որ պետք է ստիպել մարդկանց ավելի շատ ջանք ներդնել, քանի որ  պետք է պատկերացում կազմել այն երկրների մասին, որոնց գուցե չեք էլ կարող գտնել քարտեզի վրա, ընկալել այն մշակույթներն ու պատմությունները, որոնց մասին տեղյակ չեք. շատ բարդ է: Երբ որոշում ես ֆինանսավորել մարդու իրավունքները, կարծես, պատրաստվում ես դոկտորական պաշտպանել այդ ոլորտում»: