2021 թ. հոկտեմբերի 10-ին Վենետիկում տեղի ունեցավ Aurora Dialogues «Առողջապահական անվտանգություն. կորոնավիրուսի համավարակի հումանիտար մարտահրավերները» թեմայով քննարկումը՝ Իտալիայում 2021 թ. «Ավրորայի» միջոցառումների շրջանակում: 2,5 ժամ տեւած աննախադեպ այս քննարկմանը մասնակցեցին տարբեր երկրներ եւ ոլորտներ ներկայացնող բանախոսներ, որոնք բաց եւ անկեղծ խոսեցին կորոնավիրուսի հետեւանքով առաջ եկած դժվար իրականության մասին, որին բախվում են, անդրադարձան նաեւ դրա կարճաժամկետ եւ երկարաժամկետ հետեւանքներին, մատնանշեցին այն ջանքերը, որոնք պետք է ձեռնարկի համաշխարհային հանրությունը՝ ապագա աղետներից խուսափելու համար: Չնայած ցավոտ փորձառությունը, որի մասին պատմեցին մի քանի բանախոսներ, քննարկման մթնոլորտն, ընդհանուր առմամբ, լավատեսական էր. մասնակիցները մեծ հույս հայտնեցին, որ մարդկությունը դասեր կքաղի իր սխալներից: