«Կարծում եմ՝ բոլոր մարդասերներն էլ փոքր-ինչ խենթ են, որովհետեւ եթե այդպիսին չլինես, չես կարող ռիսկի գնալ եւ անել այն, ինչ մենք ենք անում համայնքներում»,- ասաց 2021 թ․ «Ավրորա» մրցանակի դափնեկիր եւ Կոնգոյացի կանանց հիմնադրամի հիմնադիր Ջուլիեն Լուսենգեն՝ «Մերօրյա հերոսներ. խիզախումի պատմություններ «Ավրորայի» հերոսներից» խորագրով քննարկման ժամանակ։  

Այս քննարկումը տեղի ունեցավ 2025 թ․ Մարդու իրավունքների եւ մարդասիրական ֆորումի ընթացքում՝ ներկայացնելով խիզախումի եւ նվիրումի ոգեշնչող պատմություններ աշխարհի տարբեր անկյուններից։ Ֆորումն անցկացվեց «Խաչմերուկին. համալիր գործողություններ հանուն կայուն ապագայի» ընդհանուր խորագրի ներքո 2025 թ․ մայիսի 7-ին՝ «Ավրորա» մարդասիրական նախաձեռնության եւ Լոս Անջելեսի Կալիֆորնիայի համալսարանի իրավագիտության դպրոցի «Խոստում» մարդու իրավունքների ինստիտուտի համատեղ ջանքերով։  

Ողջույնի խոսքում Լոս Անջելեսի Կալիֆորնիայի համալսարանի իրավագիտության դպրոցի դեկան, պրոֆեսոր Մայքլ Ուոթերսթոունը, դիմելով մասնակիցներին, ընդգծեց Լոս Անջելեսի Կալիֆորնիայի համալսարանի դերը՝ որպես իրավապաշտպան-առաջնորդներին համախմբող գլոբալ հարթակ։ «Սա է այն, ինչ մենք անում ենք Լոս Անջելեսի Կալիֆորնիայի համալսարանում։ Մենք միավորում ենք առաջատար մտածողներին եւ մարդու իրավունքների ոլորտում փոփոխություններ իրականացնողներին»,- նշեց դեկան Ուոթերսթոունը։ Այնուհետեւ նա ներկայացրեց Լոս Անջելեսի շրջանի ղեկավարների խորհրդի (5-րդ շրջան) նախագահ Քեթրին Բարգերին, որը խոսեց իրենց շրջանի դիմակայունության եւ համայնքի կողմից ղեկավարվող մարդասիրական արձագանքի կարեւորության մասին։ «Սա պարզապես խիզախության փառաբանում չէ։ Սա գործողության կոչ է, հիշեցում է, որ երբ աշխարհը երես է թեքում, ինչ-որ մեկը պետք է ընտրի առաջ շարժվելը»,- ասաց Քեթրին Բարգերը։ 

«Ավրորա» մրցանակի Ընտրող հանձնաժողովի անդամ, Africa In the World գաղափարների փառատոնի հիմնադիր եւ Պուլիցերյան մրցանակի դափնեկիր Դելե Օլոջեդեն սկսեց քննարկումն ընդգծելով, որ անգամ մութ ու դժվարին ժամանակներում դահլիճում ներկա մարդիկ մարմնավորում են անկոտրում հույսն ավելի լավ ապագայի հանդեպ․ «Մեր հավաքն այստեղ ինքնին բոցավառում է այն խիզախությունը, որն անհրաժեշտ է այս ժամանակներին դիմակայելու համար։ Եվ ո՞ւմ արժե շնորհակալություն հայտնել իրենց ներկայությամբ, աշխատանքով ու կյանքով մեզ այս քաջությունը փոխանցելու համար, եթե ոչ այս բացառիկ բանախոսներին, որոնց համախմբել ենք այստեղ ձեզ համար։ Այս օրերին շատ դժվար է հույսի նշույլներ գտնել, բայց պետք է մնալ հույսով լեցուն»։ 

2016 թ․ «Ավրորա» մրցանակի դափնեկիր եւ «Խաղաղության տան» հիմնադիր Մարգարիտ Բարանկիցեն խոսեց միջազգային ֆինանսավորման կործանարար կրճատումների եւ դրա ծանր հետեւանքների մասին այն մարդկանց համար, որոնք կախված են այդ աջակցությունից։ «Կան մանուկներ, տարեցներ, 29․000 երեխա, որոնք պետք է դպրոց հաճախեն, եւ ջուրը հասանելի լինի նրանց, մինչդեռ ընդունվում են որոշումներ՝ առանց որեւէ բացատրության։ Այդ պատճառով էլ ես այստեղ եմ, որպեսզի ասեմ ձեզ՝ սա միայն աֆրիկացի ժողովրդի կամ մյուսների տառապանքը չէ։ Մենք բոլորս մեկ ընդհանուր ընտանիք ենք»,- ասաց Մարգարիտ Բարանկիցեն։ «Երբ մարդիկ դադարում են մարդ լինել, դա ողջ մարդկության ամոթն է»։