Գործարար-առաջնորդ, «Զուտ դրական. ինչպես են բարգավաճում համարձակ ընկերությունները՝ տալով ավելին, քան վերցնում են» գրքի համահեղինակ, որը, ըստ «Ֆայնենշլ թայմսի», ճանաչվել է տարվա բիզնես-գիրք:  

Փոլ Փոլմանն իր գործունեությամբ խթանում է գործարար աշխարհի քայլերը կլիմայի փոփոխության եւ անհավասարությունների դեմ պայքարում:  

Լինելով Unilever ընկերության գլխավոր գործադիր տնօրեն (2009-2019 թթ.)՝ նա ցույց տվեց, որ երկարաժամկետ ու տարբեր շահագրգիռ կողմերի մասնակցությամբ գործելու ձեւաչափը բիզնեսի համար ուղեկցվում է ֆինանսական գերազանց ցուցանիշներով: Փոլմանի պաշտոնավարման ընթացքում բաժնետերերն ականատես եղան, թե ինչպես է  ընկերությունը կայունության տեսանկյունից մշտապես զբաղեցնում առաջին տեղն աշխարհում՝ միաժամանակ ապահովելով եկամտաբերությունն 290% աճ։   

Այսօր Փոլ Փոլմանն ընդգրկված է մի շարք կազմակերպություններում՝ առաջ մղելու ՄԱԿ-ի կայուն զարգացման նպատակները, որոնց մշակմանն անձամբ է աջակցել: Սա ներառում է նրա աշխատանքը Systemiq-ի հետ՝ համակարգերի փոփոխությունը եւ նորարարական արդյունաբերական կոալիցիաները խթանելու ուղղությամբ, այդ թվում՝ նորաձեւության եւ սննդի ոլորտներում: Նա ղեկավարում է ՄԱԿ-ի «Գլոբալ կոմպակտ» պայմանագիրը, Race to Zero ծրագրի դեսպան է եւ ջանքեր է գործադրում առաջնորդների հաջորդ սերունդը զարգացնելու ուղղությամբ՝ Օքսֆորդի համալսարանի Սայիդ բիզնես դպրոցի, INSEAD, One Young World եւ այլ հարթակների միջոցով: Փոլ Փոլմանն ակտիվ քարոզարշավ է իրականացնում մարդու իրավունքների մի շարք խնդիրների ուղղությամբ, այդ թվում՝ նպաստելով հաշմանդամություն ունեցող անձանց ներառմանը Valuable 500 կազմակերպության եւ Kilimanjaro Blind Trust բարեգործական հիմնադրամի միջոցով, որը նա ստեղծել է իր կնոջ՝ Քիմի հետ: