ԱՄՆ նախկին դիվանագետ եւ ռազմածովային հետախուզության սպա Րաֆֆի Գրեգորյանը խոսեց հոր՝ «Ավրորայի» համահիմնադիր եւ ականավոր մարդասեր, երջանկահիշատակ Վարդան Գրեգորյանի (1934–2021 թթ․) թողած ժառանգության եւ այն արժեքների մասին, որոնք յուրացրել է իր ծառայության ընթացքում։ Նա պատմեց այն կարեւոր դասերի մասին, որոնք սովորել է՝ աշխատելով գլոբալ հակամարտությունների գոտիներում՝ մասնավորապես Բալկաններում։ 

«Այսօր առավոտյան մարդասեր-հերոսներին լսելիս ինձ իսկապես ցնցեց այն, որ դուք գիտեք՝ ոչ ոք չի գալու ձեզ փրկելու։ Այդուհանդերձ, դուք անում եք այն, ինչ պետք է անեք՝ առանց սպասումների, որ որեւէ մեկը կգա օգնության։ Դուք օգնում եք ձեր հարեւաններին, ձեր համայնքին կամ նույնիսկ անծանոթների։ Դա պարզապես ապշեցուցիչ է։ Շնորհակալություն, այստեղ ներկա մարդասերներին, որովհետեւ դուք եք իրական հերոսները եւ դուք եք պատճառը, որ «Ավրորան» գոյություն ունի»,- ասաց «Ավրորայի» Տնօրենների խորհրդի անդամ Րաֆֆի Գրեգորյանը։

Մարդու իրավունքների հայտնի պաշտպան, բեսթսելլերի հեղինակ, Enough նախագծի եւ The Sentry նախաձեռնության համահիմնադիր (հիմնել են Ջորջ Քլունիի հետ) Ջոն Փրենդերգասթը պատմեց, թե ինչպես է դարձել ակտիվիստ։ Ամեն ինչ սկսվել է 1983 թվականին տեղի ունեցած մի հուզիչ հանդիպումից, երբ նա ծանոթացել է երկու տղաների՝ անօթեւանների կացարանում ապրող Մայքլի եւ Ջեյմսի հետ։ Այդ հանդիպումից հետո նա որոշել է դառնալ մենթոր տղաների համար, ինչը հիմնովին փոխել է նրա կյանքի ընթացքը։

«Ու ահա՝ բում, կայծակի պես մի բան խփում է սրտիս, եւ մտածում եմ՝ պետք է ինչ-որ բան անել։ Դրանից հետո՝ քառասուն տարվա ընթացքում, ես եւս ինը հոգու մենթոր եմ դարձել, այսինքն՝ ընդհանուր 11 հոգի… նրանք դարձել են իմ ընտանիքի մի մասը»,- նկատեց Ջոն Փրենդերգասթը՝ պատմելով այդ տարիների ընթացքում սովորած դասերի մասին․ «Առաջին դասը՝ լինել թիմի, դաշինքի, շարժման մաս։ … Քո ձայնը, երբ միացնում ես ավելի մեծ ջանքերի, արշավի, շարժման, դառնում է շատ ազդեցիկ։ Ու ինձ միշտ դուր է եկել երկար ժամանակ առաջ գրված պոեմի այս տողը․ «Նրանք փորձեցին թաղել մեզ, բայց չգիտեին, որ մենք սերմեր ենք»։

Ողջ կոնֆերանսի ընթացքում կարմիր թելի պես անցնում էր մի միտք, որ պատմությունները կամուրջ են դեպի ապրումակցում, իսկ ապրումակցելը տանում է գործողության։ «Ավրորայի» առաքելության առանցքում մարդն է, որն առաջին պլան է գալիս գլոբալ մարտահրավերների համայնապատկերում, քանի որ յուրաքանչյուր ճգնաժամի ետեւում կա մարդ, ընտանիք, պատմություն։

Ամփոփելով քննարկումը՝ Արմինե Աֆեյանը մտածելու նյութ տվեց լսարանին․ «Պատմությունը միայն այն մասին չէ, թե ինչ է եղել քեզ հետ, թեեւ դա պատմության մի մասն է։ Բայց պատմությունն այդտեղ չի ավարտվում։ Իրական հետաքրքիր հատվածն սկսվում է այն պահից, երբ դու որոշում ես, թե ինչ անել այդ ամենի հետ եւ ինչ ուղղությամբ գնալ դրանից հետո»։

Մարդասիրության թեմայով կոնֆերանսը ավարտվեց հուզիչ ակորդով՝ Ալոե Բլեքի՝ SHINE երգի ակապելլա կատարմամբ։