Հուդա ալ-Սարարին իր «Պաշտպանություն հանուն իրավունքների եւ ազատությունների» կազմակերպության միջոցով պատերազմից քայքայված Եմենում իրավաբանական աջակցություն է ցուցաբերում մարդու իրավունքների խախտումների զոհ դարձած անձանց:  Լինելով մարդու իրավունքների, արդարության եւ հավասարության ջատագով՝ նա գրեթե մեկ տասնամյակ նվիրել է մարդու հիմնարար իրավունքների պաշտպանությանը՝ համագործակցելով այնպիսի հաստատությունների հետ, ինչպիսիք են Հանուն իրավունքների եւ ազատությունների «Ադալա» հիմնադրամը, Եմենի ազգային հանձնաժողովը, որը հետաքննում է մարդու իրավունքների խախտումների վերաբերյալ հաղորդումները:

2017 թ.-ին նա առանցքային դերակատարություն ունեցավ Եմենում գործող գաղտնի բանտային ցանցի հետաքննման եւ բացահայտման գործում, որտեղ ապօրինի անազատության մեջ էին պահում եւ խոշտանգում հազարավոր մարդկանց: Նա կարողացավ միջազգային հանրության ուշադրությունը բեւեռել խնդրի վրա եւ հասնել ավելի քան 260 կալանավորի ազատ արձակմանը:

Նա Եմենի կանանց միության անդամ է, որը խրախուսում է կանանց քաղաքացիական իրավունքները,  իրավաբանական աջակցություն տրամադրում նրանց եւ պաշտպանում կին բանտարկյալների իրավունքները: Հուդա ալ-Սարարիի առաքելությունն ավելին է, քան սոսկ նրանց համար պայքարելը. նա ցանկանում է Եմենում օրենքի գերակայություն տեսնել:

2020 թ. Հուդան արժանացել է Մարտին Էնալսի անվան մրցանակի, որը շնորհվում է բացառիկ խիզախություն ցուցաբերած իրավապաշտպաններին: