Կանանց հարցերով զբաղվող կազմակերպությունը հաճախ ապավինում է տղամարդկանց, որոնք պաշտպանում են նրանց իրավունքները, ուստի, նրանց հետ աշխատանքը կարող է օգնել ավելի արդյունավետորեն լուծել գենդերային հավասարության հարցը, ասաց 2020 թ. «Ավրորա» մրցանակի դափնեկիր, «Էլման» խաղաղության կենտրոնի ծրագրերի եւ զարգացման գծով տնօրեն Իլվադ Էլմանը: «Մենք տրամադրում ենք ապահով տուն, առողջապահական ծառայություններ եւ այլն, բայց պետք է կարգավորել սոցիալական նորմերը: Այդ ասպարեզում հիմա մենք որոշակի առաջընթաց ենք տեսնում՝ 2010 թվականի համեմատ, երբ մենք նույնիսկ չէինք կարող խոսել սեռական բռնության մասին. Այսօր ունենք սեռական հանցագործությունների մասին օրինագիծ, օրենսդրական դաշտը գնալով ընդլայնվում է, սկիզբ է դրվում հաշվետվողականությանը, մենք ունենք կանանց շարժում, որն այլեւս չի լռեցվում»,- հավելեց Իլվադ Էլմանը:

Տղամարդիկ, որոնք կանանց հավասար չեն համարում, կազմում են խնդրի առյուծի բաժինը, համաձայնեց The Reckoning Project նախագծի հիմնադիր եւ գլխավոր տնօրեն Ջենին դի Ջիովանին: Նա հիշեց, թե ինչպես էր երիտասարդ տարիներին՝ որպես պատերազմ լուսաբանող լրագրող, բախվում, այսպես կոչված, մենսփլեյնինգին, երբ տղամարդիկ թերագնահատում են կանանց իմացությունը: «Այն ժամանակ մենք չունեինք այդ բառը, բայց հիմնականում տղաներն էին ինձ ասում, թե ինչ անել: Ես պարզապես փախչում էի նրանցից եւ ինչ-որ բան անում, ու ինձ մոտ շատ ավելի լավ էր ստացվում: Ես միշտ ստիպում էի մարդկանց խոսել ինձ հետ, որովհետեւ ես ուղղակի նստում էի հատակին եւ նրանց հետ թեյ խմում ու ծխում, իսկ նրանք խոսում էին ինձ հետ: Եվ բոլորը միշտ ասում էին. «Օ՜, կանայք, գիտեք, նրանք օգտագործում են իրենց կանացի հնարքները»: Բայց ես դա չէի անում: Ես ընդամենն օգտագործում եմ իմ կանացի ինտուիցիան եւ լսելու ունակությունը»,- ասաց տիկին դի Ջիովանին:

«Ավրորայի» Տնօրենների խորհրդի անդամ, Memory Matters ընկերության հիմնադիր եւ տնօրեն, Սեպտեմբերի 11-ի ազգային հուշահամալիր-թանգարանի նախկին նախագահ եւ գլխավոր գործադիր տնօրեն Էլիս Գրինվալդը հիշեցրեց ներկաներին, որ կանայք եւ համայնքներում աշխատող կանանց կազմակերպությունները դարեր շարունակ մեծ ջանքեր են գործադրել խաղաղության հաստատման գործում: «Դուք կարող եք վերադառնալ մ.թ.ա. 5-րդ դար, երբ Արիստոֆանեսի «Լիսիստրատայում» կանայք կանգնեցրին պատերազմը։ Այն կատակերգություն է, բայց իմաստը դա է: Բուենոս Այրեսում ունենք «Mothers of Plaza de Mayo» կազմակերպությունը, [որտեղ] տատիկները մինչեւ հիմա էլ քայլերթեր են անում անհետ կորածների համար: Վերջերս երկու կազմակերպություն ի հայտ եկավ՝ «Կանայք հանուն խաղաղության» (Women Wage Peace) եւ «Արեւի կանայք» (Women of the Sun), որոնք, կարծում եմ, միասին, չգիտեմ՝ կստանան, թե ոչ, առաջադրվում են Նոբելյան մրցանակի»,- ասաց տիկին Գրինվալդը:

«Գենդերային արդարություն եւ կանանց աջակցություն» թեմայով անգլերեն քննարկման տեսագրությունը՝ ստորեւ: