Գարեթ Էվանսը 1983-1996թթ. եղել է Ավստրալիայի կառավարության նախարար՝ զբաղեցնելով Արդարադատության, Էներգետիկայի եւ բնական պաշարների, Տրանսպորտի եւ կապի, իսկ 1988-1996թթ.՝ Արտաքին գործերի նախարարի պաշտոնները։ Ավստրալիական քաղաքական դաշտում իր 21 տարվա գործունեության ընթացքում եղել է Կառավարության նախագահը Սենատում (1993-96թթ.) եւ ընդդիմության փոխնախագահը Ներկայացուցիչների Պալատում (1996-98թթ.)։ 2000-2009 թթ. եղել է Միջազգային ճգնաժամային խմբի Հակամարտությունների կանխարգելման եւ լուծման համաշխարհային անկախ կազմակերպության նախագահն ու գործադիր տնօրենը։

Պրոֆեսոր Էվանսի գործունեությունն արժանացել է բազմաթիվ պարգեւների եւ կոչումների, այդ թվում՝ Ավստրալիայի Պատվո Ասպետի շքանշանի 2012թ.։ Նույն տարում ընտրվել է Ավստրալիայի Հասարակական գիտությունների ակադեմիայի պատվավոր անդամ (FASSA)։

Պրոֆեսոր Էվանսը հեղինակել եւ խմբագրել է տասներեք գիրք, այդ թվում՝ Incorrigible Optimist: A Political Memoir (2017), Inside the Hawke-Keating Government: A Cabinet Diary (2014), Nuclear Weapons: The State of Play (համախմբագիր, 2013) եւ The Responsibility to Protect: Ending Mass Atrocity Crimes Once and for All (2008) գրքերը։ Հեղինակ է մամուլի մի շարք հոդվածների եւ պարբերականներում ու ժողովածուներում տպագրված ավելի քան 150 հեղինակային աշխատանքների, որոնք վերաբերում են արտաքին հարաբերություններին, մարդու իրավունքներին եւ սահմանադրական բարեփոխումներին։

Մելբուրնի, Սիդնեյի, Քարլթոնի եւ Քուինզի համալսարանների պատվավոր դոկտոր է, դասավանդել է աշխարհի բազմաթիվ համալսարաններում՝ ներառյալ Օքսֆորդի, Քեմբրիջի, Փրինսթոնի, Եյլի, Սթենֆորդի եւ Կենտրոնական Եվրոպայի համալսարանները։

«Պաշտպանելու պարտավորություն» (Responsibility to Protect) նախաձեռնության շրջանակներում կատարած աշխատանքի, ինչպես նաեւ հակամարտությունների կանխարգելման եւ լուծման, սպառազինությունների վերահսկողության եւ զինաթափման գործում ունեցած ավանդի համար 2010թ. պարգեւատրվել է Ֆրենկլին եւ Էլեանոր Ռուզվելտի անվան ինստիտուտի Չորս ազատությունների մրցանակով (Four Freedoms Award) «Ազատություն վախից» անվանակարգում։ 

Ներկայումս նա ղեկավարում է Ավստրալիայի ազգային համալսարանը (Australian National University), նախագահում Նյու Յորքում տեղակայված «Պաշտպանելու պարտավորություն» համաշխարհային կենտրոնի (GCR2P) խորհրդատվական կոմիտեն եւ Միջուկային զենքի չտարածման եւ զինաթափման Ասիական-խաղաղօվկիանոսյան տարածաշրջանային կենտրոնի խորհուրդը (APLN):