Վենետիկում կայացած 2022 թ. «Ավրորայի» միջոցառումների ընթացքում անցկացվեց հատուկ քննարկում՝ «Հանդիպում «Ավրորայի» համահիմնադիր Նուբար Աֆեյանի հետ» խորագրով: Այն տեղի ունեցավ Կա Ֆոսկարիի համալսարանում 2022 թ. հոկտեմբերի 16-ին: Քննարկմանը մասնակցում էին «Ավրորա» մարդասիրական նախաձեռնության համահիմնադիր, Flagship Pioneering ընկերության հիմնադիր եւ գլխավոր գործադիր տնօրեն, «Մոդերնա» ընկերության համահիմնադիր եւ նախագահ Նուբար Աֆեյանը, ՄԱԿ-ի փախստականների գործակալության ներկայացուցիչ Ռիկարդո Քլերիչին, իսկ քննարկումը վարում էր Rai TG1 լրատվականի միջազգային բաժնի ղեկավար Մարինա Սափիան:

Այս հանդիպումից մեկ օր առաջ «Ավրորա» մրցանակի շնորհման արարողության ժամանակ հայտարարվեց, որ 2022 թ. «Ավրորա» մրցանակի միջոցներից 300.000 ԱՄՆ դոլար կուղղվի Եմեն՝ հաղթահարելու աշխարհում առկա հումանիտար ամենասուր եւ անտեսված ճգնաժամերից մեկը: Այս միասնական որոշումը կայացրել էին «Ավրորա» մրցանակի դափնեկիրներն ու նախորդ տարիների հերոսները: 

Հյուրերին ու բանախոսներին ողջունելուց հետո Մարինա Սափիան մանրամասն քննարկում ծավալեց մրցանակի միջոցների մի մասը ՄԱԿ-ի փախստականների գործակալությանը փոխանցելու եւ այդ ճանապարհով Եմենում աղետալի հումանիտար իրավիճակը հաղթահարելու ջանքերի մասին՝ դիտարկելով «Ավրորայի» տեսլականն ու ազդեցությունը:

Հստակեցնելու եւ բացատրելու համար, թե որտեղից է առաջացել այս պահին տեղի ունեցող ճգնաժամերի հաղթահարմանն աջակցելու որոշման անհրաժեշտությունը՝ Նուբար Աֆեյանն անդրադարձավ 2020 թվականի Արցախյան (Լեռնային Ղարաբաղի) պատերազմին։ Դրա հետեւանքները մեղմելու համար «Ավրորա» մարդասիրական նախաձեռնությունը որոշեց, որ մրցանակի միջոցների մի մասը պետք է ուղղվի արցախցիների աջակցությանը: «Մենք որոշեցինք, որ պետք է նախ առանձնացնել տվյալ պահին ընթացող որեւէ ճգնաժամ եւ մարդասիրական օգնություն ցուցաբերել՝ որպես առաքելության մի մաս, իրար կապելով դափնեկրի համար կարեւոր նախագծերն ու տվյալ պահին տեղի ունեցող համամարդկային բնույթի որեւէ ճգնաժամ: Այդ պահին դա Արցախում էր: Զգալի եւ կարեւոր արդյունք ունեցանք, ու մենք որոշեցինք շարունակել այս ճանապարհը»,- ասաց Նուբար Աֆեյանը:

Դրանից հետո խնդիր դրվեց որոշելու աշխարհում այն վայրը, որտեղ ամենից շատ ունեն օգնության կարիք, եւ «Ավրորան» խորհրդակցեց իր մարդասիրական համայնքի անդամների հետ: «Դափնեկիրների եւ հերոսների ճնշող մեծամասնությունն ընտրեց Եմենը: Որքանով է մեծ ճգնաժամը եւ որքանով է մեծ միջամտելու անհրաժեշտությունը, որքանով է այն հրատապ եւ որքանով է անտեսված. սրանք են ընտրության չափանիշները: Նրանց կարծիքով՝ Եմենի ճգնաժամն ամենաանտեսվածն էր»,- բացատրեց Նուբար Աֆեյանը: