«Երիտասարդական Ավրորա» հինգերորդ ամենամյա նախագծի եզրափակիչ փուլ են հասել UWC Ատլանտիկ, UWC Արեւելյան Աֆրիկա եւ Waterford Kamhlaba UWC Հարավային Աֆրիկա քոլեջների թիմերը` իրենց ներկայացրած նախագծերով: «Երիտասարդական Ավրորան» իրականացվում է «Ավրորա» մարդասիրական նախաձեռնության, «Միացյալ աշխարհի քոլեջների», Scholae Mundi կրթական հարթակի եւ Teach For All (Կրթություն բոլորի համար) համաշխարհային ցանցի համագործակցությամբ: Ամեն տարի այն հնարավորություն է տալիս մասնակցող ուսանողական թիմերին ներկայացնելու նախագծեր, որոնք նպատակ ունեն հաղթահարելու իրենց համայնքների մարդասիրական խնդիրները: Եզրափակիչ հասած բոլոր երեք թիմերն այժմ կպատրաստվեն իրենց նախագծերի վերջնական ներկայացմանը ժյուրիին 2021 թ. հոկտեմբերի 14-ին:
Այս տարի «Երիտասարդական Ավրորայի» նախընտրական փուլին ներկայացվել էր 15 նախագիծ գրեթե բոլոր UWC դպրոցներից եւ Աֆրիկյան առաջնորդության ակադեմիայից: Դրանք բոլորն ուղղված էին մարդասիրական կարեւոր խնդիրների ստեղծարար լուծումներին:
Սոցիալական ազդեցության Nomanini ծրագրային ապահովման ընկերության հիմնադիր, նախընտրական հանձնաժողովի անդամ Վահիդ Մոնաջեմը հայտարարեց. «Սա առաջին, բայց հուսով եմ՝ ոչ վերջին անգամ է, որ հանդես եմ գալիս «Երիտասարդական Ավրորայի» ժյուրիի կազմում: Ես տպավորված եմ աշխարհը բարեփոխելու այս միասնական ձգտումով, որի արտահայտման ձեւերն այնքան տարբեր էին: Հաշվի առնելով ներկայացված առաջարկների բարձր չափորոշիչները՝ դժվար էր գնահատել: Դրանցում արտահայտված նվիրվածությունը, պրակտիկ մոտեցումն ու ինքնահայեցողության աստիճանն ինձ լավատեսություն են ներշնչում ապագայի հանդեպ՝ անկախ մարտահրավերներից, որոնց բախվում է մարդկությունը»:
Նախագծերի թեմաները բազմազան են՝ Հոնկոնգի դպրոցների LԳԲՏՔԻԱ+ (LGBTQIA+) ուսանողներին աջակցելուց մինչեւ Ճապոնիայի եւ Կորեայի երիտասարդների համախմբում՝ քննարկելու իրենց երկրների պատմության կնճռոտ հարցերը, Կանադայի Մետուլիա համայնքի անоթեւաններին օգնելու համար լուծումներ փնտրելուց մինչեւ Արցախի ուսանողներին կրթական աջակցություն տրամադրելը: Բոլոր նախագծերը գնահատվել են ըստ վեց չափորոշիչի՝ ստեղծարարություն, կայուն լուծումներ, հետազոտության որակ, հնարավոր ազդեցություն, նվիրվածություն եւ ինքնահայեցողություն: Եզրափակիչ փուլ հասած երեք նախագծերի մասին ավելին կարող եք ընթերցել ստորեւ:
Ըստ «Երիտասարդական Ավրորայի» պահանջի՝ յուրաքանչյուր թիմ պետք է բացահայտի մարդասիրական խնդիր, որն ազդում է իրենց շրջակա համայնքի վրա: Մինչդեռ UWC դպրոցի եւ Աֆրիկյան առաջնորդության ակադեմիայի համաշխարհային սփռման շնորհիվ բոլոր 15 նախագծերի համընդհանուր ազդեցությունը տարածվում է չորս մայրցամաքների՝ բազմաթիվ երկրների եւ համայնքների վրա: Բոլոր 15 թիմերը, անկախ այն հանգամանքից՝ հասել են եզրափակիչ փուլ, թե՝ ոչ, նախընտրական հանձնաժողովից մանրամասն դիտարկումներ են ստանում, ինչը կօգնի նախագծերի հետագա զարգացմանն ու իրագործմանը: Եզրափակիչ հասած երեք թիմերն այդ նկատառումները կներառեն իրենց վերջնական առաջարկներում՝ նախագծերը ժյուրիին ներկայացնելուց առաջ: Նրանք ժյուրիին կներկայանան հոկտեմբերին՝ պայքարելով 4.000 ԱՄՆ դոլար դրամաշնորհի համար:
Հինգերորդ տարին անընդմեջ «Երիտասարդական Ավրորան» հնարավորություն է տալիս ուսանողներին գործով բարեփոխելու աշխարհը՝ մարդասիրական խնդիրները հաղթահարելով նորարարական եւ կայուն լուծումների օգնությամբ:
Ինչպես նկատեց Teach For All կրթական համաշխարհային ցանցի ուսուցման եւ զարգացման մասնագետ, 2021 թ. նախընտրական հանձնաժողովի անդամ Մարթա Լուսիա Քուփֆերը. ««Երիտասարդական Ավրորան» աջակցում է երիտասարդներին, քանի որ հենց նրանց ձեռքում պետք է կենտրոնացած լինի բարեփոխումներ իրականացնելու ուժը»:
Եզրափակիչ հասած երեք թիմերը.
UWC Ատլանտիկ. «Լսելով միմյանց»
Այս նախագիծն ուղղված է երիտասարդների շրջանում մտավոր առողջության ճգնաժամին: Թիմի նպատակն է ստեղծել հասակակից ունկնդիրների հարթակ հարեւան դպրոցների համար՝ հիմնված մի մոդելի վրա, որը 11 տարի փորձարկվել է UWC Ատլանտիկ քոլեջում, որով ուսանողներին վերապատրաստում եւ խրախուսում են օգնելու հոգեկան առողջության խնդիրներով այլ ուսանողների: Այս մոդելը տարածելով տարածաշրջանի ավելի շատ դպրոցներում՝ ուսանողներն իրենց համայնքում կօգնեն հաղթահարելու երիտասարդների շրջանում աճող մի շարք հոգեկան խնդիրներ:
Խոսելով նախագծի հանդեպ ունեցած իր հավատի մասին՝ թիմի անդամ Էլամեյը, որը Ուելսից է եկել, ասաց. «Ես հավատում եմ այս նախագծին, քանի որ անձամբ եմ տեսել, թե այն ինչ դրական ազդեցություն կարող է ունենալ անհատների եւ համայնքի վրա: Տեսել եմ, թե այն որքան օգտակար է ուսանողների համար, որոնք իրենց խնդիրներով հանգիստ կարող են մոտենալ հասակակիցներին, նաեւ այն, թե որքան օգտակար է, երբ հասակակիցները պատրաստ են լսելու նրանց, ովքեր աջակցության կարիք ունեն: Ես նաեւ տեսել եմ, որ երբ ուսանողներն ակտիվորեն աջակցում են հոգեկան առողջությանն ուղղված ջանքերին, առօրյա զրույցներում այդ մասին խոսելու մշակույթն ավելի է տարածվում, եւ, ընդհանուր առմամբ, համայնքում թեմայի վերաբերյալ տաբուներն ավելի քիչ են: Քանի որ նախկինում ես սովորել եմ Ուելսի տեղական դպրոցներում, որտեղ իմ եւ իմ տարեկիցների հոգեկան առողջությունն առաջնահերթություն չէր՝ անկախ դրա վատթարացումից, ես գիտեմ, թե որքան մեծ է կարիքն այնպիսի համակարգի, որը մշտապես կընդունի ու կաջակցի: Եվ ես հավատում եմ, որ խնդրի լուծումը հասակակից ունկնդիրների մոդելի ինտեգրումն է տեղական դասարաններ»:
Waterford Kamhlaba UWC Հարավային Աֆրիկա․ «Հույսի սերմեր»
Այս թիմի նպատակն է աջակցել Մալինձա փախստականների ճամբարի երիտասարդներին՝ նրանց համար ստեղծելով երիտասարդական կենտրոն, որը միաժամանակ կծառայի եւ որպես առցանց կրթական կենտրոն, եւ որպես սոցիալական տարածք: Հաշվի առնելով նոր մարտահրավերները, որոնց նրանք բախվել են վերջին մեկուկես տարում, ուսանողները հույս ունեն օգնելու մեղմել այս շրջանի կրթական եւ հոգեկան առողջությանն առնչվող վատ հետեւանքները:
Անդրադառնալով նախագծում կատարած իր աշխատանքին՝ «Հույսի սերմեր» թիմի անդամ Փրինսը (որը մեծացել է Կոնգոյի Դեմոկրատական Հանրապետությունում մինչեւ 2017 թ.՝ որպես փախստական Զիմբաբվե տեղափոխվելը) ասաց. «Այս նախագիծը ցույց է տալիս, որ երիտասարդների՝ դրական փոփոխություններ իրականացնելու մասին երազանքները վերացական բնույթի չեն, մենք նաեւ մարտահրավեր ենք նետում ավանդական գործելաոճին՝ առաջարկելով աշխարհը բարեփոխելու ավելի ռեալ եւ հստակ միջոցներ: Այս ծրագրի վրա աշխատելը բացառիկ հնարավորություն էր ինձ համար ավելի լավ իմանալու իմ ուժեղ եւ թույլ կողմերը: Այն նաեւ վերահաստատեց, թե որն է իմ նպատակը եւ ինչն է իմաստավորում իմ կյանքը: Այն կտրուկ փոխեց իմ պատկերացումը մարդասիրական խնդիրների բարդության մասին, որոնք մենք ձգտում ենք հաղթահարել»:
UWC Արեւելյան Աֆրիկա․ «Լորաքս» նախագիծ
«Լորաքս» նախագծի նպատակն է լուծել հողի էրոզիայի եւ անտառահատման խնդիրը «սերմ-ռումբերի» տարածմամբ, որն Արուշայում (Տանզանիա) կիրականացվի տեղի դպրոցի ուսանողների օգնությամբ: «Ռումբերը» սերմով, հողով եւ կավով լցված փոքրիկ գնդեր են, որոնք պատրաստել են UWC Արեւելյան քոլեջում՝ սոցիալական պատասխանատվության զարգացման ծրագրի շրջանակում: «Ռումբերը» տարածելու են քոլեջի ուսանողները, ինչպես նաեւ տեղական դպրոցների այլ աշակերտներ՝ օգնելով ծառեր աճեցնել տարածքում: Թիմը նախատեսում է նաեւ տեղի դպրոցները վերազինել անձրեւաջրերի հավաքման համակարգով, որն ապահովում է խմելու մաքուր ջուր: Սա նրանք կարող են նաեւ օգտագործել չոր սեզոնին իրենց տնկած ծառերը ջրելու նպատակով:
Թիմի անդամ իրանցի Ամիտիսը պատմեց, թե որքան տարված է նախագծով. «Հողի էրոզիան մեծ խնդիր է Տանզանիայում եւ ընդհանուր Արեւելյան Աֆրիկայում, բայց, ցավոք, ոչ բոլոր երկրներն են փորձում լուծել խնդիրը: Այդուհանդերձ, Քենիայում խնդրի դեմ պայքարել են «սերմ-ռումբերի» օգնությամբ: Տեսնելով նրանց հաջող արդյունքները՝ ես հավատում եմ, որ մենք ճիշտ մեթոդ ենք ընտրել: Բացի այդ, նախագծում ընդգրկելով տեղական դպրոցների երեխաներին եւ նրանց տրամադրելով ոչ միայն «սերմ-ռումբեր» եւ դրանց մասին գիտելիք, այլ նաեւ անձրեւաջրերի հավաքման համակարգ, մենք էական ազդեցություն կունենանք նրանց կյանքի վրա: Այս նախագիծը կօգնի հարյուրավոր երեխաների՝ նրանց հասանելի դարձնելով մաքուր ջուր, մրգատու ծառեր եւ ավելի ապահով դպրոցական միջավայր: Ես հասկանում եմ, որ մեր նախագիծը չի լուծի խնդիրն ամբողջ Տանզանիայում, բայց հավատում եմ, որ այն ճիշտ ուղղությամբ արված մեծ քայլ է եւ մի օր կարող է վերաճել մեծ ծրագրի, ինչպիսին Seedballs Kenya նախագիծն է: Նախագծի վրա աշխատանքն ինձ օգնել է հասկանալ, որ եթե վճռական ես՝ բարեփոխելու որեւէ բան, միշտ կարող ես գտնել աջակցություն: Այն ինձ ցույց տվեց, որ գործընկերներ գտնելով՝ ցանկացած բան կարող ես անել»:
Լուսանկարում՝ Waterford Kamhlaba UWC Հարավային Աֆրիկա, UWC Արեւելյան Աֆրիկա եւ UWC Ատլանտիկ քոլեջների թիմերը: