Multifaith Alliance (Բազմակրոն դաշինք) կազմակերպության գլխավոր տնօրեն Շադի Մարտինին պատմեց սեփական փորձառության մասին. «Սիրիան, ավանդաբար, վերջին 50 կամ 60 տարում այն ​​երկիրը չէր, որտեղից շատ փախստական էր դուրս գնում: Եվ հանկարծ ես նույնպես դարձա փախստական: Ու հասկացա, որ անկախ նրանից, թե դու ով ես, ինչ կարգավիճակ ունես, հանկարծ կարող ես դառնալ փախստական»։ 

Նա հիշեց, թե ինչպես 2013 թ. անսպասելի հանդիպում ունեցավ իսրայելական հասարակական կազմակերպության ներկայացուցիչների հետ, որոնք ցանկանում էին օգնել փախստականներին: Ի սկզբանե լինելով թերահավատ՝ Մարտինին շուտով հասկացավ, որ նրանք եւս իր նման մարդասիրական աշխատանք են իրականացնում: «Անկեղծ ասած, մինչեւ այդ ես չէի հանդիպել Իսրայելից որեւէ մեկին։ Եվ դա փոխեց իմ մտածելակերպն այն մասին, որ պետք չէ մարդկանց մասին դատել՝ ելնելով նախապաշարմունքներից: Երբեմն շփումն այնպիսի մարդկանց հետ, որը չէիք սպասի, փոխում է ընկալումները»: Մարտինին այսօր էլ շարունակում է իր աշխատանքը շահույթ չհետապնդող Multifaith Alliance կազմակերպության շրջանակում: Այն օգնում է հաղթահարել տեղահանությունների հետեւանքով առաջացած ճգնաժամերը կրոնական եւ աշխարհիկ ավելի քան 100 գործընկերների հավաքական ջանքերով:

2016 թ. «Ավրորա» մրցանակի դափնեկիր եւ «Խաղաղության տան» հիմնադիր Մարգարիտ Բարանկիցեն պատմեց իր անցած ճանապարհի մասին՝ 1990-ականներին Բուրունդիի կոտորածներին ականատես լինելուց մինչեւ փախստականների իրավունքների անձնվեր պաշտպան դառնալը՝ շարունակելով հույս եւ ապաստան տալ մարդկանց: «Այն, ինչ փորձեցի անել Բուրունդիում, նոր սերունդ դաստիարակելն էր, որը կկարողանար կոտրել բռնության այս շղթան: Ես շատ բան արեցի իմ ժողովրդին արժանապատիվ կյանք տալու համար: Ցավոք սրտի, 2015 թ. ինձ դատապարտեցին, իսկ հետո փորձեցին սպանել։ Հետո ես ​​դարձա փախստական, բայց երբեք չհանձնվեցի։ Հիմա ես աշխատում եմ Ռուանդայի փախստականների ճամբարներում, որպեսզի պարգեւեմ հույս եւ ձեւավորեմ նոր սերունդ, քանի որ մեր նվիրական գործն է այս աշխարհը դարձնել դրախտ»:

Define American մեդիայի ժամանցային ծրագրերի պատասխանատու Դուլսե Վալենսիան կարեւորեց լրատվամիջոցների ուժը ներգաղթյալների եւ փախստականների մասին ընկալումների ձեւավորման գործում. «Մենք մեդիա կազմակերպություն ենք, որն աշխատում է պատմությունների միջոցով մարդկայնացնել ներգաղթյալների մասին ընկալումները: Define American-ի հիմքում այն համոզմունքն է, որ մշակույթն առավել է քաղաքականությունից: Մենք չենք կարող փոխել քաղաքականությունը ներգաղթի վերաբերյալ, քանի դեռ չենք փոխել ներգաղթյալներին ընկալելու մշակույթը: Սա այն գործն է, որն անասելի անձնական նշանակություն ունի ինձ համար՝ որպես ներգաղթյալ, որը նախկինում իր կյանքի մեծ մասը փաստաթղթերի խնդիր է ունեցել, ինչպես նաեւ՝ որպես զուտ հեռուստատեսության երկրպագու»:  

Ամփոփելով այս հետաքրքիր քննարկումը՝ մոդերատոր եւ «Ավրորայի» ղեկավար Արմինե Աֆեյանը շնորհակալություն հայտնեց բոլոր ներկաներին, այդ թվում՝ Հաննա Գերիին եւ Կալիֆորնիայի համալսարանի Իրավագիտության դպրոցի «Խոստում» ինստիտուտին՝ միջոցառումը հյուրընկալելու համար: «Անհատական ​​ջանքերը վերաճում են համակարգային փոփոխության: Մենք ամենուրեք տեսնում ենք կանաչ ծիլեր։ «Ավրորան» հսկա ենթակառուցվածքի մի փոքր մասն է, բայց մենք ձգտում ենք ներկայացնել առանձին անհատների պատմություններ՝ որպես իրական լրացում մարդասիրական ինստիտուցիոնալ համակարգին՝ այն փոքր-ինչ ավելի մոտեցնելով մեզ, որպեսզի փոքր-ինչ ավելի պարզ դառնա՝ արդյոք կա՞ առաջընթաց»,- նշեց Արմինե Աֆեյանը։

Քննարկմանը հետեւեց 2016 թ. «Ավրորա» մրցանակի դափնեկիր Մարգարիտ Բարանկիցեի մասին վավերագրական ֆիլմի հատուկ ցուցադրությունը: Նա իր մարդասիրական բացառիկ առաքելությունը Բուրունդիում սկսեց այն բանից հետո, երբ ականատես դարձավ իր 72 ընկերների եւ գործընկերների սպանդին: 

Գլխավոր լուսանկարում (աջից ձախ)՝ Արմինե Աֆեյան, Դուլսե Վալենսիա, Շադի Մարտինի, Մարգարիտ Բարանկիցե