2024 թ. սեպտեմբերի 24-ին «Ավրորան» անցկացրեց «Մարդասիրական կարիքներ. ընդհանուր ռազմավարություններից դեպի կոնկրետ գործողություններ» խորագրով Aurora Dialogues քննարկում: Այն անցկացվեց Նյու Յորքում տեղի ունեցող ՄԱԿ-ի Գլխավոր ասամբլեայի 79-րդ նստաշրջանի ընթացքում, որտեղ հավաքվել էին համաշխարհային առաջնորդները՝ բարձրաձայնելու միջազգային հրատապ խնդիրները: 

Քննարկմանը բացման խոսքով հանդես եկավ «Ավրորա» մարդասիրական նախաձեռնության ղեկավար Արմինե Աֆեյանը: Որպես առաջին սերնդի ամերիկահայ՝ նա ներկայացրեց իր անձնական կապն ու կարեւորեց «Ավրորայի» առաքելությունը, որը ներկայացնում է խոցելի մարդկանց եւ նրանց օգնող անհատների պատմությունները: «Ամեն առաջացած ճգնաժամի հետ, ամեն տեղահանված համայնքի հետ ձեւավորվում է նոր սփյուռք: Նրանք գալիս են տարբեր տեղերից, նրանք գնում են տարբեր տեղեր, նրանք ընդգրկում են աշխարհի բոլոր անկյունները եւ նրանք ունեն ընդհանուր մի բան՝ վերապրելու ունակություն: Ճգնաժամերի հետեւանքով ձեւավորվում է այն վերապրողների սփյուռքի համայնքներ: Նրանք ունեն հարմարվելու եւ կյանքը շարունակելու եզակի հմտություն ու շատ դեպքերում օգնում են ուրիշներին նույնն անել»,- ասաց տիկին Աֆեյանը: 

«Աշխարհում տեղահանվածներից շատերը փախչում են հակամարտություններից, որոնք տեւում են տարիներ, նույնիսկ տասնամյակներ: Լինի դա Աֆղանստանում, թե Սիրիայում, թե Մյանմայում, թե Վենեսուելայում. սրանք ակնթարթային բռնկումներ չեն»,- նշեց Community Sponsorship Hub կազմակերպության գործադիր տնօրեն Էննի Նոլթ-Հենինգը: «Միլիոնավոր մարդկանց համար սա նշանակում է դիմանալ հարկադիր տեղահանման դանդաղ, տանջալից իրականությանը: Ու այսպիսի հակամարտությունների պայմաններում մարդասիրական ջանքերը կենսական նշանակություն ունեն կյանքեր փրկելու գործում, իսկ հովանավորելը միջոց է, որը հնարավորություն է տալիս մեզ մարդասիրական աշխատանքով զբաղվել մեր իսկ համայնքներում»: Նա նաեւ ընդգծեց մարդասիրական գործողությունների շղթայական ազդեցության կարեւորությունը եւ ներկայացրեց Welcome Corps ծրագիրը, որը տեղի բնակչությանը հնարավորություն է տալիս օգնել փախստականներին եւ կառուցել ներառական համայնքներ: 

ԱՄՆ պետքարտուղարի բնակչության, փախստականների ու միգրացիայի հարցերով օգնական Ջուլիետա Վալս Նոյեսը պատմեց Կուբայից արտագաղթած իր ընտանիքի եւ շատ ուրիշների պատմություններ: Նա խոսեց Welcome Corps ծրագրի ազդեցության մասին, որն ամեն օր ոգեշնչում է ամերիկացիներին մարդասիրական ջանքեր գործադրել: «Աշխարհում բազմաթիվ են վայրերը, որտեղ շատ մարդիկ աջակցության կարիք ունեն: Տառապանքը շատ է: Սակայն փախստականների վերաբնակեցումն իսկապես երկարաժամկետ լուծում է այս մարդկանց համար: Եվ դա հույսի աղբյուր է, ու դուք այդ լուծման մի մասն եք։ Երբեմն դժվար է գտնել լույսի շողեր մեր այս բարդ աշխարհում, բայց այսօրվա հանդիպումն, ըստ իս, դրանցից մեկն է. շատ շնորհակալ եմ բոլորիդ»: 

Այնուհետեւ քննարկումը շարունակեցին Community Sponsorship Hub կազմակերպության փոխտնօրեն Բասմա Ալավին, Փախստականների օգնության միջազգային ծրագրի տնօրեն եւ համահիմնադիր Բեքքա Հելերը, «Սամբուրուի աղջիկներ» հիմնադրամի հիմնադիր եւ գործադիր տնօրեն Ջոզեֆին Կուլեան եւ Բանգլադեշի կանանց եւ երեխաների «Հույս» հիմնադրամի հիմնադիր, բժիշկ Իֆթիքեր Մահմուդը: Նրանց հետ քննարկումը վարում էր Devex մեդիահարթակի գործընկերությունների գծով փոխնախագահ Ջենի Քարդամոնը: 

«Սամբուրուի աղջիկներ» հիմնադրամի հիմնադիր եւ գործադիր տնօրեն Ջոզեֆին Կուլեան ընդգծեց համայնքային առաջնորդներին, մասնավորապես կանանց եւ աղջիկներին աջակցելու կարեւորությունը՝ տրամադրելու հարթակներ իրենց գաղափարները ներկայացնելու համար, ինչպես նաեւ ապահովելու ուժեղ գործակցություն միջազգային կազմակերպությունների հետ: «Երբ դու դրսից ես, չես կարող լուծումներ առաջարկել: Մեր խնդիրների լուծումները մենք գիտենք, ձեռք մեկնեք մեզ եւ միասին մենք կարող ենք լուծել դրանք»,- ասաց տիկին Կուլեան։ «Ցույց մի տվեք մեզ հարցերի լուծման ձեր նորացված ճանապարհները, քանի որ դրանք տեղական մակարդակում չեն աշխատի։ Վստահեք մեզ, որպեսզի անենք այն, ինչ ամենալավն ենք անում, եւ մենք միասին կարող ենք մեծ հաջողությունների հասնել»: