Մանրամասն դիտարկումից հետո 2023–2024 թթ. «Երիտասարդական Ավրորա» մրցույթի եզրափակիչ փուլ են անցել մասնակից դպրոցների՝ UWC Փիրսոն քոլեջի, UWC Չանգշու Չինաստանի եւ UWC Մահինդրա քոլեջի թիմերն իրենց ներկայացրած նախագծերով:

«Երիտասարդական Ավրորան» իրականացվում է 2017 թվականից ի վեր «Ավրորա» մարդասիրական նախաձեռնության, UWC միջազգային գրասենյակի, Teach For All (Կրթություն բոլորի համար) համաշխարհային ցանցի եւ Աֆրիկյան առաջնորդության ակադեմիայի համագործակցությամբ: «Երիտասարդական Ավրորայի» նպատակն է ոգեշնչել երիտասարդներին՝ լուծելու հրատապ մարդասիրական խնդիրներն իրենց համայնքներում: Այս տարի մրցույթին նախագծեր են ներկայացրել UWC տասնչորս դպրոցների եւ քոլեջների թիմեր՝ ցույց տալով իրենց հանձնառությունը՝ դիմագրավելու առկա մարտահրավերները:

UWC միջազգային խորհրդի անդամ դոկտոր Էնդրյու Մաքդոնալդը, որն առաջին անգամ է նախընտրական հանձնաժողովի կազմում, նշեց. ««Երիտասարդական Ավրորայի» հանձնաժողովում լինելն ինձ հնարավորություն տվեց անձնամբ զգալու, թե ինչ ազդեցություն ունի UWC կրթությունն ուսանողների վրա: Ներկայացված նախագծերն արտացոլում էին աշխարհի տարբեր անկյուններից հավաքված մեր հրաշալի ուսանողներին եւ նրանց գիտելիքները, ըմբռնումը, հոգատարությունը եւ խանդավառությունն աշխարհի ու հատկապես նրանց նկատմամբ, ովքեր առավել կարիքավոր են: Նախագծերից յուրաքանչյուրը ներկայացնում էր ուսանողների խումբ, որոնց համար կարեւոր է ճիշտ եւ բարի գործեր անել այս աշխարհում: Յուրաքանչյուր թիմ ներկայացնում էր լավ մտածված, մանրամասն պատրաստված եւ ուսումնասիրված նախագիծ: Չնայած այն բոլոր մարտահրավերներին եւ բացասական նորություններին, որոնց առնչվում ենք, հուսադրող է այն, որ ունենք նման երիտասարդ առաջնորդներ, որոնք առաջ են շարժվում՝ բոլորի համար ավելի լավ աշխարհ ստեղծելու նպատակով: Ինձ համար պատիվ էր լինել դրա մի մասը»:

Ներկայացված էին բազմազան նախագծեր, որոնք ներառում էին հասարակական խնդիրների լայն շրջանակ, ինչպես օրինակ՝ մշակույթի պահպանումը եւ բնապահպանական խնդիրները: Երեք նախագծեր շեշտը դրել էին տեւական աղքատության վրա՝ ցույց տալով, թե ինչպես են հաճախ փոխկապակցված տեղական եւ գլոբալ խնդիրները: Նրանք մեծ ուշադրություն էին դարձրել կրթության եւ հիմնական ռեսուրսների հասանելիության վրա: Բացի այդ, որոշ նախագծերում մեծ դերակատարում ունեին տեխնոլոգիական լուծումները: Թիմերից մեկը մշակել էր հագուստի փոխանակման հավելված, որը նպաստում է նորաձեւության «շրջապտույտի» զարգացմանը տնտեսության մեջ՝ նվազեցնելով տեքստիլ թափոնները: Մեկ այլ թիմ ստեղծել էր չաթբոտ աղբի կառավարման համար՝ հաշվի առնելով լոկալ էթնիկ տարանջատումները:

Եզրափակիչ փուլ հասած UWC Փիրսոն քոլեջի, UWC Չանգշու Չինաստանի, UWC Մահինդրա քոլեջի երեք թիմերը հանձնաժողովի անդամներին տպավորեցին ներկայացված խնդիրների մասին իրենց համապարփակ ընկալմամբ եւ նորարարական մոտեցումներով: Այժմ նրանք հնարավորություն ունեն կատարելագործելու իրենց նախագծերը մինչեւ դրանք եզրափակիչ փուլում ներկայացնելը, որը տեղի կունենա մարտին: Հաղթող թիմը կստանա ֆինանսավորում՝ նախագիծն իրագործելու համար: UWC միջազգային խորհրդի անդամ եւ փորձառու հանձնաժողովական Իվանա Սիթումն ընդգծեց. «Ամեն օր, լինի UWC քոլեջում, թե մեկ այլ վայրում, որտեղ ունենք շրջանավարտ, կյանքի է կոչվում տեղական եւ համաշխարհային մարտահրավերներին առնչվող գաղափար: «Երիտասարդական Ավրորա» մրցանակի միջոցով գաղափարն անհրաժեշտ ճանաչում է ձեռք բերում եւ ռեսուրսներ՝ կայուն նախագիծ դառնալու համար, իսկ որոշները նույնիսկ շարունակվում են՝ գրանցվելով որպես կազմակերպություններ»: 

Եզրափակիչ հասած երեք թիմերը

UWC Չանգշու Չինաստան. «Լուսավորչություն»

«Լուսավորչություն» նախագծի նպատակն է զորացնել անապահով գյուղաբնակ երիտասարդներին՝ նրանց տրամադրելով ռեսուրսներ եւ աջակցություն իրենց նպատակներն իրագործելու համար: Քննարկումը որպես ուսուցման մեթոդ կիրառելով՝ ուսանողները բացահայտում են եւ լուծում անձնական ու համայնքային խնդիրներ, որոնք ի վերջո վերաճում են համայնքակենտրոն նախաձեռնությունների՝ նպաստելով դրական փոփոխություններին: 

«Լուսավորչության» թիմի անդամ Աննիկան մեկնաբանում է. ««Լուսավորչությունը» պարզապես ուսումնական ծրագիր էր՝ խթանելու քննադատական միտքը: Ինչեւէ, դաշտային աշխատանքի ընթացքում ես հասկացա, թե որքան մեծ ազդեցություն այն կարող է թողնել գյուղաբնակ ուսանողների կյանքի վրա: Մի աղջիկ ինձ ասաց. «Դու միակ մարդն ես այստեղ, որն ինձ հարցրեց, թե ինչն է ինձ հետաքրքիր, եւ հավատաց, որ կարող եմ ցանկացած բանի հասնել կյանքում»: Ես հասկացա, որ «Լուսավորչությունն» ավելին է տալիս այս ուսանողներին, քան պարզապես հմտությունների զարգացումը. այն հույս էր սերմանում: Այս գիտակցումը շրջադարձային էր նախագծի համար. ես հասկացա, որ մեր տված կրթությունը գերազանցում է զուտ բովանդակությունը, այն ինքնին հենց փորձառություն է»:

UWC Մահինդրա քոլեջ. «Ջուրը՝ որպես սկիզբ» (AquaRoots)

«Ջուրը՝ որպես սկիզբ» նախագիծն ուղղված է Մահարաշտրա նահանգի գյուղական համայնքների պարենային անապահովության եւ տնտեսական խոցելիության հաղթահարմանը՝ բանջարանոցների եւ ջրի զտման համակարգերի ստեղծմամբ: Այս կայուն նախաձեռնությունը հնարավորություն է տալիս ընտանիքներին դառնալու ինքնաբավ՝ արդյունքում բարելավելով նրանց կյանքի որակը: 

Թիմի անդամ Կարման բացատրում է տեղական նախաձեռնությունների կարեւորությունը. «Իմ նվիրումը «Ջուրը՝ որպես սկիզբ» նախագծին բխում է աղքատության շղթան կոտրելու՝ համայնքային նախաձեռնությունների փոխակերպող ազդեցության նկատմամբ ունեցած  հավատից: Մուլշիի հովտում ընտանիքների չարչարանքին ականատես լինելն ամրապնդեց համապարփակ լուծումների անհրաժեշտությունը: Այս նախագիծն ավելին է, քան պարզապես անհապաղ օգնության տրամադրումը. այն աջակցություն է անհատներին փոքրիկ բանջարանոցների եւ ջրի զտման միջոցով: Այս մոտեցումը ոչ միայն անդրադառնում է պարենային անապահովությանը, այլեւ առնչվում է ջրի հետ կապված մարտահրավերներին՝ նպաստելով առողջության բարելավմանը եւ տնտեսական կայունությանը: Այսպիսի փոքրածավալ նախագծերն օրինակ են այն հիմնարար փոփոխությունների, որոնք կարող են իրականացնել համայնքային նախաձեռնություններն անապահով համայնքներում»:

UWC Փիրսոն քոլեջ. «Օջախ»

«Օջախ» նախագիծն աջակցում է ալկոհոլի եւ թմրամիջոցների չարաշահումից տուժած անհատներին՝ համայնքային մակարդակում իրականացվող քայլերի եւ պատմությունների միջոցով: Երիտասարդական ցանց ստեղծելով եւ իրազեկությունը բարձրացնելով՝ նախագիծը նպատակ ունի խթանելու կարեկցանքն ու համերաշխությունը Վիկտորիայի երիտասարդության շրջանում: 

Թիմի անդամ Չարվին կարեւորում է երիտասարդներին ներգրավելու անհրաժեշտությունը. «Ես հավատում եմ մեր նախագծին, որովհետեւ զգում եմ, որ այն ունի մեծ ներուժ՝ դրականորեն ազդելու ափիոնային ճգնաժամի վրա: Երիտասարդներին ներգրավելն այն կարեւոր բաղադրիչն է, որն ինձ ստիպում է հավատալ նախագծի հաջողությանը: Երիտասարդությունը ձգտում է փոփոխության, ինչն էլ կիրառում է եւ ինչին աջակցում է այս նախագիծը: Նրանց ներգրավվածությունն այս ծրագիրը դարձնում է կայուն եւ տեւական՝ օգնելով երկարաժամկետ դրական փոփոխություններ իրականացնել շրջակա համայնքում: Այս մոտեցումը քննարկելիս ես հասկացա, թե որքան կարեւոր է երիտասարդների ներգրավումը: Ես հասկացա, թե որպես երիտասարդ ինչ ազդեցություն կարող եմ ունենալ իմ համայնքում»: