Հիմնադիրներ

Armenian

«Ավրորա» մարդասիրական նախաձեռնությունը Վարդան Գրեգորյանի, Նուբար Աֆեյանի եւ Ռուբեն Վարդանյանի մարդասիրական ձեռնարկումն է։ Հիմնադիրները փորձում են ձեւավորել մարդասիրական համաշխարհային նոր շարժում։

«Ավրորա» մարդասիրական նախաձեռնությունն ստեղծում, ներառում եւ օժանդակում է նախագծեր, որոնց նպատակն է բարձրացնել հանրային իրազեկվածությունն աշխարհի առավել հրատապ մարդասիրական հիմնախնդիրներից շատերի վերաբերյալ եւ քայլեր ձեռնարկել դրանց լուծման ուղղությամբ։ Այդ նախագծերից են «Ավրորա» մրցանակը, Aurora Dialogues քննարկումները, «Ավրորա» մարդասիրության ցուցիչը, Երախտագիտության նախագծերը եւ 100 LIVES նախաձեռնությունը։ 

 

Վարդան Գրեգորյան

Վարդան Գրեգորյանը Նյու Յորքի Կարնեգի կորպորացիայի նախագահն է։ Երկու տասնամյակ տեւած գիտական փայլուն առաջընթացից հետո նա գլխավորել է Նյու Յորքի Հանրային գրադարանը։ Նրա ութամյա նախագահության շրջանին է վերագրվում գրադարանի մշակութային եւ ֆինանսական կայունության վերականգնումը։

Վարդան Գրեգորյանը 1989-1997թթ. եղել է Բրաունի համալսարանի (Brown University) ռեկտորը։ Իր պաշտոնավարության ընթացքում նա կազմակերպել է «Ռեկտորական դասախոսությունների շարքը» (President's Lecture Series), ինչպես նաեւ 500 միլիոն դոլարի դրամահավաք։

2004թ. ԱՄՆ-ի նախագահ Բուշի կողմից պարգեւատրվել է Ազատության նախագահական շքանշանով (Presidential Medal of Freedom)։ 2009թ. նախագահ Օբաման Վարդան Գրեգորյանին նշանակել է Սպիտակ Տան կրթաթոշակային հանձնաժողովի անդամ (White House Fellowships Commission)։ «Ավրորա» մրցականաբաշխության Ընտրող հանձնաժողովի անդամ է։

 

Նուբար Աֆեյան

Նուբար Աֆեյանը Flagship Pioneering վենչուրային կապիտալի ֆոնդի կառավարող գործընկերն է եւ գլխավոր գործադիր տնօրենը։ Իբրեւ նորարար, գործարար, գլխավոր տնօրեն եւ վենչուրային կապիտալի կառավարիչ՝ Նուբար Աֆեյանն իր 25-ամյա գործունեության ընթացքում համահիմնադրել եւ աջակցել է 30 նորաստեղծ (start up) ընկերությունների։

Դոկտոր Աֆեյանը ներգրավված է բազմաթիվ պետական եւ մասնավոր ընկերությունների ու կազմակերպությունների ղեկավար խորհուրդներում՝ ներառյալ Բոստոնի սիմֆոնիկ նվագախումբը եւ Հայաստանի UWC Դիլիջան քոլեջը։ Գործուն մասնակցություն ունի Հայաստանի զարգացմանն ուղղված մի շարք նախագծերում։ Լինելով գիտնական՝ Նուբար Աֆեյանն իբրեւ ավագ դասախոս դասավանդում է Մասաչուսեթսի տեխնոլոգիական համալսարանի (MIT) Սլոունի անվան Մենեջմենթի դպրոցում։ Հեղինակ է մի շարք գիտական հրապարակումների։ Միացյալ Նահանգներում եւ աշխարհում ակտիվ դասախոսում է բազմաթիվ հարցերի շուրջ՝ ձեռներեցությունից, նորարարությունից եւ առաջնորդությունից մինչեւ բիոտեխնիա, դեղերի հայտնագործում, բժշկական տեխնոլոգիաներ եւ վերականգնվող էներգիա։

 

Ռուբեն Վարդանյան

Ռուբեն Վարդանյանը սոցիալական ներդրող է, գործարար եւ բարերար, RVVZ հիմնադրամի համահիմնադիրն ու նախագահը։ Նախկինում` մինչեւ 2012թ. հունվար, «Ռուսաստանի Սբերբանկ» եւ «Տրոյկա Դիալոգ» ընկերությունների միավորման գործարքի կայացումը, զբաղեցրել է «Տրոյկա Դիալոգի»՝ Ռուսաստանի եւ ԱՊՀ երկրների ամենահին եւ ամենամեծ ներդրումային բանկերից մեկի գործադիր տնօրենի, իսկ այնուհետեւ՝ գլխավոր տնօրենի, ընկերությունների խմբի տնօրենների խորհրդի նախագահի պաշտոնները։

Ռուբեն Վարդանյանը ռուսաստանյան եւ համաշխարհային (Ճապոնիա, Բրազիլիա, Հայաստան) մի շարք խոշոր ընկերությունների, կրթական հաստատությունների, մասնագիտական եւ փորձագիտական կազմակերպությունների կառավարող եւ խորհրդակցական մարմինների անդամ է։ Միաժամանակ հանդիսանում է «Սկոլկովո» մոսկովյան կառավարման դպրոցի հիմնադիր-գործընկերն ու հոգաբարձուների միջազգային խորհրդի փոխնախագահը, ինչպես նաեւ՝ Զարգացող շուկաների հետազոտական ինստիտուտի ղեկավար խորհրդի նախագահը։

Ինչպես Ռուսաստանում, այնպես էլ Հայաստանում ակտիվորեն ներգրավված լինելով բարեգործության մեջ՝ Ռուբեն Վարդանյանը նախաձեռնում եւ իրականացնում է կայուն զարգացմանն ուղղված մի շարք երկարաժամկետ բարեգործական նախագծեր։ Դրանց թվին է պատկանում Հայաստանում գործող UWC Դիլիջան քոլեջը՝ համաշխարհային մակարդակի կրթական հաստատություն, որի բացմանը նա ցուցաբերել է մեծագույն օժանդակություն։ Պարգեւատրվել է պետական եւ միջազգային մի շարք պարգեւներով։ Իր առաջնորդական արժանիքների եւ մասնագիտական էթիկայի շնորհիվ մեծ համբավ ունի ֆինանսական աշխարհում։

Display type: 
No header