logo
ՓԱԿԵԼMenu
Դանա Լեոնգը ելույթ կունենա  Երեվանում #AraratChallenge փառատոնին

Դանա Լեոնգը ելույթ կունենա Երեվանում #AraratChallenge փառատոնին

Հայտնի էլեկտրական թավջութակահար եւ թրոմբոնահար Դանա Լեոնգը կմասնակցի #AraratChallenge փառատոնին, որը տեղի կունենա 2019թ. հոկտեմբերի 19-ին եւ 20-ին Երեւանի Ազատության հրապարակում, «Ավրորա» ֆորումի ընթացքում: Նպատակ ունենալով խանդավառել մարդասիրության շուրջ համախմբված շարժում՝ երկօրյա փառատոնը համատեղում է մշակույթն ու կրթությունը եւ ներկայացնում է հանրային ոգեշնչող ելույթներ, երաժշտական կատարումներ, քննարկումներ, դասախոսություններ եւ վարպետության դասընթացներ:

Լեոնգը սերում է երաժշտական մեծ ​​տոհմից։ Նա Սթենֆորդի համալսարանում երբեւէ ջազային երաժշտություն դասավանդած ամենաերիտասարդ դասախոսն է, որն այդ աշխատանքն ստանձնել է 16 տարեկան հասակում։ Նրա երաժշտական գործունեությունն ընդգրկել է բազմաթիվ ժանրեր. լատինամերիկյան ջազի ոլորտում «Գրեմմի» մրցանակներն ստացել է Պակիտո Դ'ռիվերայի հետ համագործակցության համար։ Աշխատել է նաեւ Քանյե Ուեսթի, Շոն «Փի Դիդի» Քոմսի, դիջեյ Էյ-Թրաքի, դիջեյ Քյուբերտի եւ այլ նշանավոր երաժիշտների հետ։ TEDx Շանհայ կոնֆերանսի խոսնակ Լեոնգը Համաշխարհային տնտեսական ֆորումի Երիտասարդ գլոբալ առաջնորդներից է եւ երաժտության ԱՄՆ դեսպան։

«Ես ուրախ եմ ու ոգեւորված #AraratChallenge փառատոնին սպասվող համերգով. աշխարհի առաջատար մարդասերներով ու նորարարներով շրջապատված լինելն ինքնին մեծ պատիվ է։ Իմ նպատակներից մեկն ուրիշներին օգնելն է՝ օգտագործելով երաժիշտի եւ արվեստագետի կարգավիճակս: Բարիք գործելը #AraratChallenge փառատոնի հիմքում է, ու ես լավատես եմ, որ երաժշտության եւ արվեստի միջոցով մենք կկարողանանք միավորվել նոր հույսով», -ասաց Դանա Լեոնգը:

#AraratChallenge փառատոնն ուղղված է այն մարդկանց, որոնք ոգեշնչված են «Ավրորա» մարդասիրական նախաձեռնությանն աջակցելու գաղափարով։ Փառատոնին են միացել նշանավոր բանախոսներ, այդ թվում՝ «Ավրորա» մարդասիրական նախաձեռնության նախագահ Թոմ Քաթինան, 2016թ. «Ավրորա» մրցանակի դափնեկիր եւ «Խաղաղության տան» հիմնադիր Մարգարիտ Բարանկիցեն, «Վաշինգտոն փոստ» օրաթերթի խմբագրի տեղակալ եւ սյունակագիր Դեյվիդ Իգնաթիուսը, «Կրթություն բոլորի համար» ցանցի համահիմնադիր եւ գլխավոր տնօրեն Ուենդի Քոփը, «Կանանց միջազգային արշավ» կազմակերպության նախագահ Մարջորի Մարգոլիսը, եզդիների իրավապաշտպան Լամյա Հաջի Բաշարը եւ ուրիշներ։

#AraratChallenge փառատոնը կներկայացնի նաեւ արվեստին ուղղված միջոցառումներ, որի ընթացքում արվեստագետները կաշխատեն ներկաներից կազմված խմբերի հետ՝ ստեղծելու արվեստի համատեղ գործեր, որոնք աշխարհի տարբեր երկրների եւ տարածաշրջանների համար «նոր սկիզբ» են խորհրդանշում: Ազգային ու գլոբալ իմաստալից եւ կայուն փոփոխության հասնելու նպատակով մշակված «Ավրորա» ֆորումի շրջանակում տեղի ունենալիք փառատոնի օրակարգում ընդգրկված են նաեւ Հայաստանի սիրված մարզաձեւերից մեկի՝ շախմատի մրցաշար, ինչպես նաեւ տարբեր թեմաներով՝ գորգագործությունից սկսած մինչեւ բլոգ վարելու վարպետության դասընթացներ։

Հավելյալ տեղեկությունների համար՝ https://auroraforum.com

Լուսանկարը՝ Սալվա Մենդեսի